Indiamei tuang Meicpy phuhmei hei mpeyna kathuk naimei ramhlam geicna tithay loumei bamv akhat swna Maansei sing( Meic nunc tuang lwnlung), Syandui Chaeng, Latrik & nchammei lwan, Kaisw samhsw & Tampy duanmei, Daicthaumei guangmei, Puanhmei & theihmei, Zaatc & kathaek, Lat, Ravchap, Chuanchaimei/ Meichaeng tangh makmei, Pak guangmei, Charuangc lev Chingkhiuhchap akhatni Maansei lunghmei gat/ thaek azuh hei kwm 1872 khou rui kahouhna 2021 rui 16th tanghmei Meicsing phuhmei sw nituang the. Census nthanna tiimei akhatni kalam guay khuam kaduai loumei hei mpeyna gay e twna laa e. Namv , Kaidai, kailiangh tuang swmei nthukmei latlam nunc mphang e. State & Central government rui saengcthau daicthaumei lwan ( Planning) khang lw sw khang gaeng e. Sw mak nuh makmei swna kandih kwn padeih khang langwanh- lanvdaenghmei nunc nganv nthukmei dam laa towmei bamv sw e.
Dihlangv(Delimitation) / Constituencies riat khang Parliamentary/Assembly/Panchayat/ District Council kaguay hei mansei sing Census rui tiimei khou phaydyng swna kasiamh e. Census rui Kandih akhat tuang tat kanmei kin khou tuang zauc han datmei khou adihkamv tat gut tha twmei zauc datmei bamv sw e. Ntau tau tat key bammei scheme nunc ( Mission Antodya) & guang dat nimei kaganv khou sinthau nimei chamvraeng kasiamh khang daicna kage nai e.
Heizaeng rui ” Our Census – Our Future” twna saa bammei tei e.
Census rui aniw khou tithay loumei kiu aniw zaatc akhat swna tabui khou tat nina? Tabui khou bam bo? Twmei nthana lyan lou ngam e. charuangc rui kage naimei kasiamh thau khang kabamv lyan lou ngam the. School kasiamh khang, Hospital kasiamh khang, kaithyan kasiamh khang tabui thiak swna Fund hei tii ni Cho twmei tithay lou e.
Maansei azuh sih rui tax tiina lungc nuhmei tha twmei ni phuc than pat re. Kandih tuang syanraeng khou azuh sih guang nimei twmei ta ni tithay loumei paan rui syan mpat key nimei raengv hei thay gay the. Mai, Dui, Chaeng, Taektu, Pumhgayluan, Rigaan & bai baihmei azuh khang mpat pat nimei kasing-kading kachaeng heic the twmei ding ngam the.
Aniw Rongmei zaat akhat swna Census khou lungh lou makmei hei aniw tuang phaydyng, phaykaamv kabamv thay makmei akhat sw bam tuang e. Zaatc akhat tuang Census hei nthanna thay ethei – Education, Health, Economic, Fertility, Mortality, Resource Mobilization, Land/ Boundary kage naimei guay thayna zaatc tuang Road Map nai nuh the. Aniw hei mwang na swna kauc bammei thiak guay hei gaengmei phungc guang zat nituang hamh the. Namv namv khou Census 2021 hei COVID-19 luai kan ethei kahouh bam nuh the twtuang e tiki sw kan mak ge. Lungh gutna kasiamh lou khang nai the. Zaatc lwn thay kaguak bammei nunc tei ni aniw rui thayna bammei govt of India rui thay lou bammei Rongmei tribe twmei lyan pat lou khang nai the. Zaatc khang lungh gutna kaphianh lou nii bammei guay Mikumhmei khou hei kadam laa lou tho. Phwam swna bammei nunc ni meictuang meictuang thaek khou karamc lou kho. Bureaucrats nunc rui ni ranvna taanc lou khang nai the. Kaganv guangmei ta nkhwan makna ahuna chamvdaanv lou bam khang nai the.
Maansei sing raumei hei maan key khang peyna chalahna maan kan pwni e. Rongmei zaat hei lat akhatna samei de chapriak akhatna mei de puakthau puaksiak khou rui bangkhun akhatna de. MAANSEI raumei hei gay makmei azuh ariu nuhmei chaeng nai the kumhpui zaeng rui tampy nai kanmei guay nah geih khang nai e. Ntaymei ( meetei) hei akhatna puancna lungc guang khou rui asei zaatc baihmei rui lungc bin punimei ta how ahuna dwanmanna lungc bam the. Kaikhunh khat khou nah padei/ kathumh puanc ethei aniw tuang population hei mbu ku pwni e. Kanei puanhmei hei mbu mak ge tiki nowpu tei lou lyn lou tuang na de twna chak e. Maansei geihmei hei duidaih kumc guang bammei ntay- saengbaenghmei rui aluak mak khang kachaeng akhat the. Population hei balance sw khang kasiamh lou mak ge tei suai makna meimiwmei zaat khatni Pangalmei rui zynna maan guang punimei how e. Rongmei zaat nthyammei zaat Ramhthay khang nai e.
Rongmei Ringsaeng diu!
Kadongai Panmei, Telegram channel (Ruangmei Phwam)
Discover more from Rongmei Encyclopedia
Subscribe to get the latest posts sent to your email.
Rongmei Encyclopedia 